Growing the Economy from the Village

KONSEPTU LITERASIA FINANSEIRA: FUNDAMENTU BA AUTONOMIA EKONOMIKA NO ESTABILIDADE NASIONAL IHA TIMOR-LESTE

Husi:

Carlos Soares Ribeiro, Lic. Eco., MM || Dosente Universidade Da Paz Fakuldade Ekonomia || Jestaun

Abstraktu

Literasia finanseira sai hanesan elementu fundamentál ba autonomia ekonomika individuál no estabilidade sistema finanseiru nasional. Artigu ida ne’e analisa konseptu literasia finanseira bazeia ba estrutura teórika husi Organisation for Economic Co-operation and Development (OECD), ne’ebé define literasia finanseira hanesan kombinasaun konhesimentu, habilidade, atitude, no komportamentu ne’ebé presiza atu halo desizaun finanseira ne’ebé di’ak. Artigu ne’e mos esplora relasaun entre literasia finanseira no inkluzaun finanseira, no analisa relevánsia iha konteks Timor-Leste. Metodolojia ne’ebé uza mak revizaun literatura sistemátika husi relatóriu internasional no estudu empiriku. Rezultadu hatudu katak nivel literasia finanseira ne’ebé aas kontribui ba reduzaun vulnerabilidade ekonomika, aumentu poupansa nasional, no estabilidade sistema bankáriu. Rekomendasaun prinsipál mak integrasaun literasia finanseira iha kuríkulu edukasaun formal no politika públika nasional.

Palavra-xave: literasia finanseira; inkluzaun finanseira; edukasaun ekonomika; jestaun osan; Timor-Leste

1. Introdusaun

Mudansa iha sistema finanseiru global lori kompleksidade boot ba desizaun ekonomika individuál. Produtu hanesan kreditu konsumtivu, kartãu kreditu, investimentu digital, no servisu bankáriu online aumenta risku se konsumidor la iha kapasidade atu komprende implikasaun finanseira.

Tuir definisaun husi OECD (2018), literasia finanseira mak kombinasaun awareness, knowledge, skills, attitudes, and behaviors ne’ebé permite individuál atu atinji bem-estar finanseiru. Definisaun ida ne’e amplia perspetiva tradisional ne’ebé limita literasia finanseira ba konhesimentu teóriku de’it.

Iha nivel global, estudu sira hatudu katak nivel literasia finanseira sei relativament baasu iha nasaun sira iha faze dezenvolvimentu (Lusardi & Mitchell, 2014). Situasaun ida ne’e mos relevante ba Timor-Leste, ne’ebé sistema finanseiru sei iha faze konsolidasaun.

2. Estrutura Teórika Literasia Finanseira

2.1 Dimensaun Konhesimentu

Konhesimentu refere ba komprensaun konseptu báziku hanesan inflasaun, taxa juros, diversifikasaun risku, no valor tempu husi osan. Lusardi dan Mitchell (2014) argumenta katak komprensaun konseptu ida ne’e korrelasiona ho kapasidade poupansa no planeamentu pensiun.

2.2 Dimensaun Habilidade

Habilidade mak aplikasaun prátika husi konhesimentu, inklui elaborasaun orsamentu, jestaun dívida, no avaliasaun produtu finanseiru. Atkinson no Messy (2012) subliña katak habilidade prátika mak indikator importante ba medisaun literasia finanseira.

2.3 Dimensaun Atitude no Komportamentu

OECD (2018) enfatiza katak atitude poupansa no orientasaun ba futuru influensia komportamentu finanseiru. Individuál sira ne’ebé iha atitude disiplinadu tende halo desizaun ne’ebé sustenta estabilidade ekonomika naruk.

3. Literasia Finanseira no Inkluzaun Finanseira

Literasia finanseira no inkluzaun finanseira mak konseptu ne’ebé relasiona maibé la identiku. Inkluzaun finanseira refere ba asesu ba servisu finanseiru formal hanesan konta banku, kreditu, no seguransa (World Bank, 2022). Maibé, asesu de’it la garante utilizasaun efetivu.

Iha Timor-Leste, Banco Central de Timor-Leste iha papel importante atu regula no promove estabilidade sistema finanseiru. Maibé, se konsumidor la komprende produtu finanseiru, risku default no sobre-endividamentu bele aumenta.

Tanba ne’e, literasia finanseira mak fundamentu ba inkluzaun finanseira ne’ebé sustentável.

4. Importánsia Makroekonómika

Iha nivel makro, literasia finanseira kontribui ba:

Aumentu taxa poupansa nasional
Reduzaun vulnerabilidade ba krize finanseira
Estimulasaun investimentu doméstiku

Studu empiriku husi Lusardi dan Mitchell (2014) hatudu relasaun positivu entre literasia finanseira no acumulasaun riqueza iha longo prazú.

5. Konteks Timor-Leste

Timor-Leste enfrenta desafiu struktural hanesan dominasaun setor informal, nivel edukasaun ne’ebé heterojéneu, no dependénsia ba reseita petrolífera. Kondisaun ida ne’e kria nesesidade urjente atu promove edukasaun finanseira iha nivel komunidade.

Relatóriu internasional hatudu katak nasaun sira ne’ebé integra literasia finanseira iha kuríkulu eskola iha progresu signifkativu iha komportamentu poupansa (OECD, 2018).

6. Diskusaun

Analiza literatura hatudu katak literasia finanseira la’ós de’it responsabilidade individuál, maibé responsabilidade sistema. Governu, banku komersiál, no instituisaun edukasaun tenke kolabora atu kria estratéjia nasional.

Iha Timor-Leste, integrasaun literasia finanseira iha ensinu sekundáriu no universitáriu bele sai investimentu estratéjiku ba dezenvolvimentu sustentável.

7. Konkluzaun

Literasia finanseira mak pilar fundamentál ba autonomia ekonomika no estabilidade nasional. Bazeia ba estrutura teórika husi OECD (2018), literasia finanseira envolve konhesimentu, habilidade, atitude, no komportamentu. Evidénsia empirika (Lusardi & Mitchell, 2014) suporta relasaun positivu entre literasia finanseira no bem-estar ekonomiku.

Ba Timor-Leste, promosaun literasia finanseira tenke sai prioridade politika públika atu garante inkluzaun finanseira ne’ebé efetivu no sustentabilidade ekonomika naruk.

Referénsia (APA 7)

Atkinson, A., & Messy, F.-A. (2012). Measuring financial literacy: Results of the OECD / International Network on Financial Education (INFE) pilot study. OECD Publishing. https://doi.org/10.1787/5k9csfs90fr4-en

Lusardi, A., & Mitchell, O. S. (2014). The economic importance of financial literacy: Theory and evidence. Journal of Economic Literature, 52(1), 5–44. https://doi.org/10.1257/jel.52.1.5

Organisation for Economic Co-operation and Development. (2018). OECD/INFE toolkit for measuring financial literacy and financial inclusion. OECD Publishing.

World Bank. (2022). Global Findex database 2021: Financial inclusion, digital payments, and resilience in the age of COVID-19. World Bank.