Veteranus Labele Depende De’it ba Pensaun

Veteranus Labele Depende De’it ba Pensaun; Tenke Sai Empreendedór no Motor Dezenvolvimentu Nasionál

Carlos Soares Ribeiro, Lic.Eco., MM

Email and Blog: tomejomadio@gmail.com ||
Independent Researcher / Universidade da Paz – Timor-Leste

Iha istória luta libertasaun Timor-Leste, veteranus sira la’ós de’it parte ida hosi narrativa independénsia; sira mak protagonista prinsipál ne’ebé entrega tempu, energia, no sakrifísiu boot atu povu ida-ne’e bele hetan ukun-an na soberania. Tanba sira nia kontribuisaun, Estadu Timor-Leste iha obrigasaun morál no polítika atu kontinua fó rekonesimentu no apoiu ba sira, ida ne’ebé durante ne’e realiza liu hosi programa pensaun veteranus.

Pensaun ida-ne’e importante no presiza, tanba nia representa forma ida hosi rekonesimentu Estadu ba luta no kontribuisaun veteranus sira. Maibé, iha perspetiva dezenvolvimentu tempu naruk, ita presiza reflete kle’an liu tan: karik pensaun de’it suficiente atu asegura dignidade no sustentabilidade ekonomia veteranus sira?

Resposta ba pergunta ida-ne’e mak klaru: lae.

Pensaun labele haree hanesan objetivu finál hosi política públika ba veteranus. Se ita limita de’it ba distribuisaun transferénsia mensal, ita bele kria kultura dependénsia ne’ebé ikus mai enfraquece kapasidade produtiva no autonomia ekonomika veteranus sira. Ida-ne’e la tuir valor luta ne’ebé durante tinan barak sira defende—valor independénsia, autonomia no dignidade.

Tanba ne’e, presiza iha mudansa paradigma: veteranus labele depende de’it ba pensaun; tenke sai empreendedór no motor dezenvolvimentu nasionál.

Liafuan ida-ne’e la’ós slogan ida de’it; nia mak orientasaun estratéjika ida ba futuru. Durante luta libertasaun, veteranus sira demonstra ona kapasidade extraordiñáriu iha lideransa, disiplin, reziliénsia no organizasaun. Iha kondisaun ne’ebé limitadu liu, sira bele mobiliza rekursu, lidera komunidade no halo desizaun estratéjika. Kompeténsia hirak-ne’e mak kapitál sosial no umano ne’ebé boot tebes no tenke aproveita iha tempu dame atu promove dezenvolvimentu ekonomiku. Ita tenke haree veteranus la’ós de’it hanesan benefisiáriu programa sosial, maibé hanesan forsa produtiva nasionál. Se veteranus sira tama iha área sira hanesan:

• Agrikultura modernu,
• Peskas no negósiu ikan,
• Koperativa komunidade,
• Turizmu lokal,
• Indústria ki’ik no média,
• No servisu inovativu,

entáun sira bele sai fatór importante ida ba kresimentu ekonomia Timor-Leste. Veteranus ida ne’ebé halo negósiu ida la de’it ajuda nia família rasik; nia mos kria empregu ba ema seluk, dinamiza merkadu lokal, aumenta movimentu kapital iha komunidade no kontribui ba ekonomia nasionál. Signifika katak veteranus empreendedór ida mak sai motor dezenvolvimentu. Iha Timor-Leste, durante ne’e ita fó atensaun boot ba empreendedorismu juventude, ida ne’ebé loos no importante. Maibé ita tenke rekonhese katak veteranus sira mos iha poténsia boot atu sai gerasaun empreendedór estratéjiku ida. Sira iha:

• Fonte kapitál inisiál hosi pensaun;
• Esperiénsia moris no lideransa;
• Rede sosial forte iha komunidade;
• No kredibilidade morál iha sosiedade.

Ne’e hotu mak vantagem estratéjika ida ne’ebé la bele ignora. Desafiu boot ida mak mudansa mentalidade. Durante tempu naruk, pensaun dala barak interpreta hanesan osan atu konsumu de’it. Maibé agora presiza muda hanoin ida-ne’e. Pensaun tenke haree hanesan kapitál produtivu, hanesan oportunidade atu investe, harii negósiu no cria patrimóniu ba família no jerasaun tuir mai. Mudansa ida-ne’e la akontese automaticamente. Presiza:

• Edukasaun finanseira;
• Ereinamentu empreendedór;
• Programa inkubasaun negósiu;
• Asesu ba kreditus produtivu;
• No apoiu institusionál hosi Governu no setor bankáriu.

Instituisaun finanséira nasional hanesan Banco do Nosso Futuro bele sai parseria estratéjika ida atu apoia transformasaun ida-ne’e, liu hosi produtus finanseirus ne’ebé adapta ba nesesidade veteranus empreendedór sira. Iha nivel polítika públika, Governu tenke hahú muda nia abordajen. Programa ba veteranus labele para de’it iha asisténsia sosial; tenke evolui ba empoderamentu ekonomiku sustentável. Modelu foun ida bele hanesan:

ü  Pensaun + Investimentu = Prosperidade

ü  Pensaun + Empreendedorismu = Independénsia Ekonomika.

Ne’e mak dalan atu garante katak pensaun la remata iha konsumismu, maibé transforma, sai kapitál produtivu. Ba veteranus sira rasik, mensajen ne’e importante: pensaun la’ós pontu finál; pensaun mak pontu hahú. Luta ida uluk mak luta ba independénsia polítika. Agora, oras atu hahú luta ba independénsia ekonomika. No iha luta ida-ne’e, veteranus tenke fila fali ba liña oin, hanesan uluk. Tanba se sira bele liberta nasaun ida hosi kolonialismu, sira mos bele liberta família sira hosi dependénsia ekonomika. Se sira bele harii independénsia Timor-Leste, sira mos bele harii fundasaun ekonomia nasionál ne’ebé forte no inkluzivu.

Ikus liu, sosiedade tomak tenke muda nia perspetiva: veteranus la’ós grupu ida ne’ebé presiza ajuda de’it; veteranus mak kapitál nasionál ida. Sira mak: empreendedór potensial, investidór komunitáriu, lider lokál, no motor dezenvolvimentu nasionál. Tanba ne’e, oras to’o ona atu ita hotu hamutuk afirma: “Veteranus labele depende de’it ba pensaun; tenke sai empreendedór no motor dezenvolvimentu nasionál.”